Nangin positibo kag produktibo ang command visit ni Police Brigadier General Randulf T. Tuaño, Regional Director sang Police Regional Office 6, sa Capiz Police Provincial Office ukon CPPO, para sa pagtalakay sang mga accomplishment sa pagpatuman sang Project Restrict, Track, and Turn-In ukon RTT 3389.
Sa interview sang Bombo Radyo kay Police Major Rachelle D. Garnica, Public Information Officer sang CPPO, iya ginpahayag nga paagi sa paggiya sang Regional Director, ginalauman nila nga mapauswag pa ang serbisyo sang kapulisan kag ang koordinasyon sa mga Local Government Units kag sa komunidad.
Suno kay Garnica, kabahin ini sang CAPeace-Tawhayan Program, nga nagapanguna sa pag-engganyo sa mga pumuluyo nga magsurrender sang mga loose firearms ukon mga armas nga wala sang nagakaigo nga dokumento.
Samtang, nakakuha ang CPPO sang 10/10 performance rating sa pagpatuman sang Project RTT 3389.
Sa pangkabug-usan, yara sa 550 ka loose firearms ang boluntaryo nga gin-turn over halin sa 473 ka barangay sa Capiz.
