Nakuha sang Capiz Police Provincial Office ukon CPPO ang Rank 1 sa Unit Performance Evaluation Rating sang Police Regional Office 6 ukon PRO6, matapos makarekord sang 90.21 percent nga rating nga ginklasipikar bilang Outstanding, sa anum ka police offices nga sakop sang rehiyon.
Sa interview sang Bombo Radyo kay Police Major Rachelle D. Garnica, Public Information Officer sang CPPO, iya ginpahayag nga ang pagkilala base sa performance sang mga police unit sa bulan sang Setyembre 2026.
Suno kay Garnica, ginbasehan sa evaluation ang nagkalain-lain nga aspeto sang ila performance, kun sa diin 70 percent ang performance sang tagsa ka unit, 20 percent ang pamatasan sang mga personnel, kag 10 percent ang pagkakompleto kag pagpasar sang mga report kag kinahanglanon nga dokumento.
Dugang pa sini, daku ang kontribusyon sang mga chief of police sang 16 ka police stations sa Capiz sa paglab-ot sang amo nga resulta, paagi sa maayo nga pagdumala sang operasyon, pag-respondent batok sa kriminalidad kag paghatag sang dekalidad nga serbisyo sa publiko.
