Padayon ang manhunt operation sang mga kapulisan batok sa isa ka Regional Target Listed Drug Personality nga nakapalagyo matapos ang search and seizure operation sa Barangay Bahit, Panit-an, Capiz.
Ginkilala ang suspek nga si Kenneth Dorado, 43-anyos, kag residente sang amo nga barangay.
Sa interview sang Bombo RAdyo kay PMAJ. Rachel Garnica, Public Information Officer sang Capiz Police Provincial Office, iya ginpahayag nga ginserbe sang mga operatiba ang Search Warrant No. 34-2026 para sa paglapas sa Republic Act 10591 ukon Comprehensive Firearms and Ammunition Regulation Act, kag Search Warrant No. 35-2025 para sa paglapas sa Republic Act 9516 ukon Illegal Possession of Explosives.
Ang operasyon ginpangunahan sang Capiz Provincial Intelligence Unit, kaupod ang Provincial Police Drug Enforcement Unit, 1st Provincial Mobile Force Company, Philippine Drug Enforcement Agency, Panit-an Municipal Police Station kag 62nd Special Action Company.
Sa pag-usisa sang puloy-an sang suspek, narekober sang mga otoridad ang isa ka Colt caliber .45 pistol , isa ka magazine sang caliber .45, lima ka live ammunition sang caliber .45, kag isa ka PRB 423 hand fragmentation grenade nga gina-clasify bilang high explosive.
Narekober man ang isa ka itom nga hand bag kag isa ka pula nga eco-bag.
Sa subong, yara sa kustodiya sang Investigating Officer-on-Case sang Panit-an Municipal Police Station ang mga narekober nga ebidensya para sa nagakaigo nga dokumentasyon antes ini iturn-over sa korte.
