Pasangkaron pa sang Capiz Police Provincial Office (CPPO) ang mga operasyon sang kapulisan agud mapabaskog ang pagpatuman sang kalinong sa bug-os nga probinsya.
Sa interview sang Bombo Radyo kay Police Colonel David L. Cachumbo Jr., Officer-in-Charge sang CPPO, iya ginpahayag nga lakip sa ila mga prioridad ang implementasyon sang IQ PASSED Program ukon Intensified Integrated Quad Policy and Administrative Support Strategy amo ang pagatutok sa tanan nga sahi sang police operations sa probinsya.
Suno kay Cachumbo, ang programa ang may tinutuyo nga mapabaskog ang kapasidad sang kapulisan paagi sa mas maayo nga polisiya, administratibo nga suporta, kag maayo nga pagpatuman sang mga programa kag operasyon.
Ginpasiguro man sini nga magapabilin nga malinong kag matawhay nga kahimtangan sa probinsya sang Capiz paagi sa mas aktibo nga police visibility, koordinasyon sa mga komunidad, kag padayon nga kampanya batok sa kriminalidad.
