ROXAS CITY – Wala nagauntat sa ila imbestigasyon ang mga kapulisan natuhoy sa pagkamatay ni Barangay Kagawad Onel Dodoy Arandez matapos nga ginluthang sang wala pa makilala nga mga suspek sa isa ka talyer sa Barangay Cagay, Roxas City.
Nahibaluan nga nagpadala na sang request ang Capiz Police Provincial Office (Capiz-PPO) sa Police Regional Office 6 agud maduso ang pagtukod sang Special Investigation Tast Group (SITG) sang mga kapulisan nga magatutok sa imbestigasyon sang pagkamatay sang nasambit nga opisyal.
Ini ang ginpahayag ni Police Executive Master Sergeant (PEMS) Donna Asmod, tagpamaba sang CPPO sang mainterview sang Bombo Radyo Roxas.
Suno kay Asmod nga padayon sa gihapon ang ginapatigayon nga imbestigasyon sang mga kapulisan agud matumod ang mga suspek nga nagpatay kay Arandez.
Ginpahayag ni Asmod nga desidido sila magbulig sa paghatag sang hustisya sa kamatayon sang nasambit nga barangay kagawad.
Sa karon, ginahulat na lamang nila ang approval sang Police Regional Office 6 natuhoy sa ila ginpadala nga request sa pagtukod sang “SITG Brgy Kagawad Onel Arandez”.
Matandaan nga una na naaresto si Arandez sa ginkasa nga drug buybust operation sang Philippine Drug Enforcement Agency (PDEA) kun sa diin ginakabig nga High Value Target si Arandez bangud isa ini ka public official kag na-identify sadtong nga nagaduso sang ilegal nga droga kag kalakip man sa Directorate for Intelligence (DI) list sang pulisya.
