Hugot nga ginapatuman sang kapulisan sa banwa sang Sigma, Capiz, ang nagkalain-lain nga crime prevention kag safety tips agud mapabilin nga ang seguridad sang mga pulumuluyo sa banwa.
Sa interview sang Bombo Radyo kay Police Major Narciso Sables Jr., Officer-in-Charge sang Sigma Municipal Police Station, iya ginpahayag nga importante nga maghalong ang publiko kag mag-verify gid sang impormasyon antes magsalig sa mga tawo nga nagapangita sang trabaho ukon naga-offer sang serbisyo.
Suno kay Sables Jr., nagakadapat nga i-verify anay sang mga employer ang background sang ila ginakuha nga mga empleyado, lakip na ang pagkuha sang police clearance, agud masiguro nga wala ini sang record nga mahimo makahatag sang peligro sa ila negosyo ukon panimalay.
Ginpahanumdom man sang kapulisan ang publiko nga maghalong sa mga tawo nga nagapakuno-kuno, kaangay sang nagapangita kuno sang trabaho ukon nagapangita sang bulig sa sulod sang balay, pero lain gali ang tinutuyo.
