ROXAS CITY – Ginpahayag sang isa ka criminal lawyer nga may lapses ang mga katapo sang Pontevedra Municipal Police Station sa ila ginhimo nga proseso sa pagpasaka sang kaso batuk kay EJ Contreras.
Suno kay Atty. Nelson Borja, isa ka criminal lawyer, nga dapat sa sulod sang 36-oras sumugod sang nagreport ang biktima sa mga kapulisan, ginpadulungan kuntani sang mga ini ang lugar sang ginatudlo suspek kag gin-aresto.
Apisar nga gin-una report sa Roxas City Police Station, kuntani nagpatigayon ang mga ini sang Pontevedra MPS sang joint operation kag ginpadulungan ang lugar sang ginatudlo suspek kag gin-aresto ini.
Ini ang dapat nga ginhimo nga procedure sang mga kapulisan kag ini kumon nga nagakahinabo sa mga insidente ilabi na sa kaso sang pagpanghimulos.
Gindugang man ni Borja nga sa kaangay sini nga kaso, ang kredibilidad yara sa babayi, bangud ang panugdaon sang Korte, indi kinahanglan ang testigo sa rape case, kundi pagabalansehon sang mga ini ang kredibilidad sang nagareklamo kag kun ano ang motibo sini sa pagpasaka sang panumbungon.
Suno pa sa abugado nga indi magreklamo ang babayi sang mabug-at nga kaso kaangay sang rape kag indi sini pag itugyan ang iya pribado nga parte sang lawas sa medical examination kun wala sang kamatuoran ang iya alegasyon.
Apang, isa sa mahimo nga depensa sang suspek amu nga isiling nga may consent ang hitabo nagikan sa babayi ukon ituad sini nga may relasyon nga nagapatunga sa duha ka persona.
Bangud sensitibo ang kaangay sini nga kaso, suno kay Borja nga kinahanglan magkuha sang mayad nga abogado agud mapadaog ang amu nga kaso.
Nahibaluan nga wala sang piyansa ang kaso nga rape kag posible mapamatbatan sang life imprisonment ang suspek.
Matandaan nga ginreklamo sang 37-anyos nga lady rider/looper kag pharmacist by profession nga taga Metro Manila ang nagapadalagan sa pagka-SB member sang Pontevedra nga si EJ Contreras sa ginaalegar pagpanghimulos, sang ini nagbisita sa headquarters sang ginatudlo suspek.
Apang sandig sa interview sang Bombo Radyo kay Governor Esteban “Nonoy” Contreras, nga hubog na ang biktima kag ginpasugat nalang ni EJ sa iya mga kaupdanan, nakatuad man suno diri si EJ nga may luyag ang babayi sa iya, apang ginapasiguro sang ila pamilya nga indi sila mag-intra sa kaso kag pagatugutan nila nga masolbar ni EJ ang iya nahimo nga sala, kun mapamatud-an nga nakapanghimulos ini, siya mismo ang maga-file sang kaso.
Sa karon, yara na sa desisyon sang Korte ang kaso ni Contreras bangud nahulog ini sa regular filing.
Nagakahulugan nga indi mahimo arestuhon ang suspek tubtob mapapanaug ang iya warrant of arrest.
