ROXAS CITY – Ginpatpat sang Civil Service Commission ang basehan sang ila talatapan sa pagpili sang magapungko para sa posisyon nga Chief of Hospital sang Roxas Memorial Provincial Hospital.
Suno kay CSC-Capiz Provincial Director Rufino Leonoras, nagasunod sila sa guidelines sang Civil Service Commission magluwas na lamang kun may yara sila sang gin-aprubahan nga guidelines gikan sa isa ka national agency.
Ginpahayag sini nga nagaagi sa maid-id nga pagpanalawsaw kag pag-verify sang selection board ang mga aplikasyon para sa anuman nga posisyon.
Mahimo naman nga kwestiyunon ukon mapa-revoke sang iban nga applicants ang appointment sang appointing authority pananglitan nga makit-an nga may yara sang wala na-meet nga kwalipikasyon.
Apang kinahanglan suno kay Leonoras nga may yara sang mabakod nga dokumento ukon ebidensiya ang isa ka aplikante nga naga-kwestiyon sang appointment sang appointing authority.
Mahibaluan nga lima tanan ka mga doktor ang aplikante para sa amo nga posisyon.
Ginalakipan ini nanday Dr. Florencio Luching; Dr. Ma. Celino Bauson; Dr. Ian Arciga; Dr. Rosario Perlas kag Dr. Alex Nolasco.
Apang nagatuhaw karon ang balita nga si Nolasco ang nahamut-an ni Capiz governor Esteban Evan ‘Nonoy’ Contreras para sa nasambit nga posisyon kag ginapahayag nga pirmado na ang appointment sini.
Nahibaluan sa pagpanalawsaw sang Bombo Radyo nga kun i-ranggo ang lima ka mga aplikante nga doktor para sa amo nga posisyon, yara sa ikalima nga ranggo si Nolasco kag yara sa pinakauna nga ranking amo si Luching.
