ROXAS CITY – Ginkumpirmar ni Mayor Joemarie Openiano, alkalde sa banwa sang Cuartero, nga may yara sila sang 12 tanan ka mga trabahante nga apektado sang temporaryo nga suspensyon sang quarry operation sa probinsya sang Capiz.
Sa interview sang Bombo Radyo kay Openiano, ginpahayag sini nga ba-se sa ila record, may duha ka mga permittees sa Brgy. Bitoon Ilawod, ang may negosyo nga gravel and sand, kun sa diin may tig-6 ka mga trabahante ang mga ini.
Dugang pa sang alkalde, nga ginpahibalo ini sang opisina sang Municipal Social Welfare and Development (MSWD) nga may mandu nagikan sa DSWD nga may palaabuton nga ayuda.
Bangud man sa mandu sang Gobernador nga hatagan sang ayuda ang mga maapektuhan sang amu nga suspensyon, mangin prayoridad ang 12 ka mga nalista nga makabaton sang nasambit nga ayuda.
Hugot man nga ginmando ni Openiano sa mga opisyal sang Barangay kag sa mga kapulisan nga i-monitor kag sundon ang mandu ni Governor Fredenil Castro nga pagbawal sa pagpatigayon sang quarry operation sa probinsya.
