CUARTERO CAPIZ – May yara na nga ginalantaw nga person of interest ang katapo sang Cuartero Municipal Police Station sa natabo nga pagpangawat sa Vicente F. Fabuna Elementary School sa Barangay Bitoon Ilaya, Cuartero, Capiz.
Sa interview sang Bombo Radyo sa hepe sang Cuartero MPS nga si PCapt. Alladen Talaban, ginapahayag sini nga naabutan na lamang sang mga manunudlo sa nasambit nga buluthuan nga guba na ang padlock sang ila nga mga classrooms.
Bangud sini, gilayon sila nga nagpangayo sang responde sa kapulisan agud ma-imbestigahan ang nagluntad nga insidente.
Suno sa hepe natigayon nga mataban sang kawatan ang duha ka mga laptop nga iya sang Department of Education (DepEd) kag ginabulubanta nagabalor sang P20,000.00 kada isa.
Pahayag sini nga wala sila nagauntat sa pagpatigayon sang operasyon agud hibalu-on kung may mga kaangtanan ang asud-asud nga pagpanulod sang pila ka mga buluthuan sa mga kabanwahanan.
Panugyan ni Talaban sa mga pumuluyo sang Cuartero nga magkooperar sa mga kapulisan kag kung may mga impormasyon nga nahibaluan may kaangtanan sa mga nagahimo sang iligal nga buluhaton, gilayon ini nga i-report sa ila talatapan.
Matandaan nga sang tinalikdan nga adlaw ginsulod man sang kawatan ang siyam ka mga hulot-klasehan sa Elementary Schoool sang Barangay Parian banwa sang Sigma.
