ROXAS CITY – Nakasugod na ang Culasi Elementary School sa pagpangkakas sang mga educational posters ukon mga clutter nga nakadikit sa pader sang mga hulot klasehan, matapos nga ginmandu ni Vice President kag Department of Education Secretary Sarah Duterte Carpio kadungan sa pagbukas sang klase sa Agusto 29, 2023.
Sa interview sang Bombo Radyo kay Mr. Sunny Doroteo OIC sang Culasi Elementary School, ginpahayag sini nga pabor ang ila buluthuan sa ginpapanaog nga mandu sang bise-presidente bangud isa lamang ini suno diri ka tikang agud makapokus ang mga estudyante sa leksyon nga ginatudlo sang tagsa ka mga manunudlo.
Subong man agud mangin matinlo, kag makapaminsar sang instakto ang mga estudyante ilabi na sa tion sang mga exams.
Apisar may yara sang pila ka mga manunudlo suno diri nga naggastos nagikan sa ila kaugalingon nga bulsa para sa pagpanami kag pagkay-o sang ila tagsa ka mga hulot, isa man ini suno kay Doroteo nga pamaagi agud makatipid kag matun-an nga mangin simple ang palibot sang hulot klasehan bangud ang importante suno sa iya ang matun-an kag ginatudlo sa mga estudyante.
