ROXAS CITY – Ginkumpirma sang gobernador nga kasunod sa pagpaidalum sa Modified General Community Quarantine (MGCQ) sa probinsiya sa masunod nga bulan sang Hunyo ang pagbawi na sang 24 oras nga curfew hour sa mga kabataan kag senior citizen.
Apang ginklaro ni Governor Esteban Evan Contreras II nga posible nga ipabilin ang curfew nga las 9 sa gab-I tobtob las 4 sa aga bangud sa positibo nga feedback nga nabaton gikan sa mga alkalde nga miyembro sang IATF kag iban nga sektor nga nagnubo ang crime rate sa probinsiya.
Apang ila pa gina-estoryahan ang proposal ni Mayor Ronnie Dadivas nga himoon alas 11 sa gab-I tobtob alas 4 sa aga ang curfew sa Roxas City agud mahatagan sang kahigayunan ang mga negosyante nga makabawi sa ila nangin kapierdihan.
Kunsultahon man ni Governor Contreras ang tag-iya sang mga restaurants angut sa pagpabakal sang ilimnon.
Apang kun mahimo nga ipaiway ang pag-inum sa guwa sang balay.
Pag-abot naman sa religious mass gathering, suno sa gobernador nga 50% lamang ang mahimo nga maakomodar agud mapatuman sa gihapon ang social distancing sa pagtambong sang misa ukon anuman nga kahiwatan.
Ginhinyo man ni Governor Contreras sa mga pumuluyo nga magsunod sa minimum health standard nga ginapatuman sang probinsiya agud malikawan ang COVID-19.
Sa gihapon suno sa opisyal nga sundon ang pagsuksok sang face mask, physical distancing, paghugas sang kamot sang tubig kag habon ukon alcohol ukon hand sanitizer bilang pag-adoptar na sa new normal.
