ROXAS CITY – Nakalista ang Philippine National Police Anti-Cybercrime Group (PNP-ACG) sang 21.84% nga pagtaas sang cybercrime cases sa pungsod sa una nga quarter sang tuig kun ikumparar sa kapareho nga period sadtong nakaligad nga tuig.
Sa datos sang PNP-ACG, ang online selling scams, credit card fraud kag investment scams ang nagapanguna sa ila nga record.
Kasunod sini, ginpahayag ni PNP Chief Gen. Rommel Francisco Marbil nga ginpasangkad na sang PNP ang kampanya batuk sa cybercrimes kag magapain sang mas madamo nga resources agud mas mapabaskog ang ila nga ikasarang sa pagbato sa nagalala nga pamahog sang mga cyber-related offenses.
Suno kay Marbil, ginapatutukan niya sa mga cyber cops ang mga kaso sang internet crimes.
Ginganyat man sini ang publiko nga gilayon magtawag sa PNP kun nabiktima sang mga kawatan ukon may ara sang concerns.
