Ginkumpirma sang kapulisan sa Prague nga “aware” sila sa sitwasyon sang Pinoy nga involved sa kaso, apang wala naghatag sang detalye angut sa pagdakop sa Former Ako Bicol Party-List representative nga si Zaldy Co sa baylo nga makig-istorya sa ila Ministry of Interior.
Una na nga gin-anunsyo ni President Ferdinand Marcos Jr. ang pagdakop kay Co sang Huwebes, kag nagsiling nga ang gobyerno nagapakig-angot sa gobyerno sang Czech agud masiguro ang pagsunod sa legal nga proseso kag mapadasig ang iya pagbalik sa Pilipinas.
Suno sa report, ang isa ka press officer sang Czech police nagsiling nga gina-sort out pa nila ang impormasyon nahanungod sa insidente antes sa katapusan magtumod sa nasambit nga ahensya para sa isa ka opisyal nga pahayag.
Samtang, nagapabilin nga tikom ang bibig sang Philippine Embassy sa Czech Republic angut sa detalye sang pag-aresto kag kun bala magahatag ini sang consular assistance sa anay mamalidha.
Si Co ang nagapangatubang sang kaso nga graft kag malversation kaupod ang 15 ka iban pa may kaangtanan sa gina-alegar substandard P289-million nga flood control project sa Naujan, Oriental Mindoro.
Matandaan nga sang Enero, ginreport nga nag-atubang si Co sa Stockholm County Administrative Board sa Sweden angut sa iya petisyon sa Korte Suprema.
Sa subong, ginahulat pa ang opisyal nga kumpirmasyon gikan sa mga otoridad sang Czech samtang nagapadayon ang koordinasyon sa tunga sang mga ahensya sang Pilipinas kag Czech Republic.
