ROXAS CITY – Gina-ekspektar na sang Department of Agriculture (DA) ang pagtaas sa presyo sang mga balaklon nga produkto sang mga mangunguma.
Sa interview sang Bombo Radyo kay Mrs. Remelyn Recoter, Regional Director sang DA Region VI, ginsiling sini nga bangud sa pagtaas sa presyo sang feeds, harina, produktong petrolyo kag iban pa, expected naman nga magamahal ang mga produkto nga ginagamitan sini.
Wala man suno diri sa lebel sang ahensya ang pag-regulate sa presyo sang nasambit nga mga balaklon bangud may tagsa-tagsa nga rason sa pagpataas ang mga manufacturer, isa na diri ang nagapadayon nga giyera sa Russia kag Ukraine.
Ginpahayag man sang Regional Director nga wala sila sang gahum agud makontrol ang presyo sang mga produkto sang mangunguma, magluwas nalang kun magapaguwa sang issuances ang presidente sa pagdeklarar sang price freeze.
