Gin-aprubahan sang Department of Agriculture (DA) ang pagtukod sang mga farm-to-market roads kag taytay nga nagabalor sang ₱2.06 billion agud mapaayo ang koneksyon sa tunga sang mga komunidad sang mangunguma kag mangingisda kag sang mga merkado.
Suno kay Agriculture Secretary Francisco Tiu Laurel Jr., ang proyekto nagasakop sang 66 kilometros nga farm-to-market roads kag 310 linear meters sang mga taytay sa probinsya sang Zambales, Oriental Mindoro, Masbate, Samar, Bukidnon, kag North Cotabato.
Ang nasambit nga proyekto ang ginapondohan sa idalom sang World Bank-supported Philippine Rural Development Program (PRDP) Scale-Up infrastructure package.
Ginpahayag ni Laurel nga ang bag-o nga mga dalan kag taytay magapadali sang pagdala sang mga produkto sa agrikultura pakadto sa merkado kag magabuhin sang gasto para sa mga mangunguma kag mangingisda.
Dugang sini nga ginmanduan ni President Ferdinand Marcos Jr. ang mga ahensya sang gobyerno nga padasigon ang pagpatuman sang proyekto, bangud kinahanglanon sang mga komunidad sa kaumhan para sa mas maayo nga koneksyon sa dalan.
Target sang DA nga i-award ang nabilin nga mga proyekto sa imprastraktura sa agrikultura sa idalom sang PRDP antes matapos ang tuig.
