Ginatun-an sang Department of Agriculture (DA) ang pagtukod sang dalagko nga solar-powered ice plants agud masolusyunan ang tuman nga pagkawasak sang mga agricultural products.
Sa idalum sang inisyal nga plano, ginsiling ni DA Sec. Francisco Laurel Jr. nga mahimo mag-alokar ang Philippine Fisheries Development Authority kag Bureau of Fisheries and Aquatic Resources sang kaugalingon nila nga pondo para sa mga planta.
Suno kay Laurel, mataas ang ‘spoilage’ sang mga high value crops sa pungsod kung sa diin naglab-ot pa sa 35% tubtob 40%.
Pinaagi sa mga dalagko nga planta sang yelo, mahimo suno diri nga masuplayan ang mga farm nagikan sa storage tubtob sa merkado kung san-o igabaligya ang mga ini.
Sa fisheries sector, mahimo suno diri nga gamiton ang dalagko nga bulto sang yelo sa mga cold storage para sa mga mangingisda nga nagapatigayon sang deep-sea fishing.
Pinaagi sini, mahimo nga maglab-ot pa sa pito ka adlaw ukon isa ka semana ang pagiging preska sang mga isda.
Posible man nga igatukod ang mga planta malapit sa mga komunidad nga ginakabug-usan sang madamo nga mga mangunguma kag mangingisda agud mapalapit sa ila ang serbisyo.
Sigurado suno diri nga magataas ang kita sang mga ini kung may yara sila sang bastante nga kita kag storage facilities agud ma-preserba ang ila mga produkto kag madala ang mga sa mga outlet nga may mas mataas nga presyuhan.
Ginpaanggid man ni Laurel ang ginahimo sang mga mangunguma nga local selling ukon sa mga lokalidad mismo ginabaligya ang mga produkto agud malikawan ang pagkawasak sini.
