Ginpahugtan sang Department of Agriculture (DA) ang mabaskog nga pagbantay sa mga supermarket kag wet markets sa bug-os nga pungsod agud masiguro ang nagakaigo nga pag-uyat kag nagakaigo nga pagmarka sang frozen nga karne, sa tunga sang nagadamo nga mga kabalaka sa food safety kag indi patas nga mga buluhaton sa pagbaligya.
Suno kay Agriculture Secretary Francisco Tiu Laurel Jr. iya na ginmanduan ang Agribusiness and Marketing Assistance Service (AMAS), Bureau of Animal Industry (BAI), kag National Meat Inspection Service (NMIS) nga magpatigayon sang mas hugot nga inspeksyon kag siguraduhon ang pagsunod sang mga retailers sa nagakaigo nga labelling kag storage regulations.
Dugang pa niya, may pila pa nga nagabaligya sang frozen nga karne sang baboy nga preska, nga nagapatalang sa mga konsumidor kag naga-apekto sa mga lehitimo nga retailers kag hog producers.
Nahibaluan nga ang presyo sang liempo nagpabilin sa ₱400/kilo, nga isa ka indikasyon sang indi patas nga paghulag sang supply chain. Bangud sini, ginatun-an sang DA ang liwat nga pagpatuman sang Maximum Suggested Retail Price (MSRP) agud maproteksyunan ang mga konsumidor.
Samtang suportado naman sang SINAG, NFHFI kag PROPORK ang panawagan nga ibalik sa 40% ang taripa sa imported nga karne sang baboy halin sa 25%.
Natalana man nga magpaguwa sang administrative circular ang DA para sa reclassification sang pork jowls agud masiguro nga mabaton ang insakto nga taripa, kasunod sang pagtaas sang demand gikan sa mga food processors kag restaurant operators.
