Kumpiyansa ang Department of Agriculture nga makumbinser pa ang mga mangunguma sa pungsod nga padayon nga magtanom sa sa tion nga mapatuman na ang floor price sa humay.
Suno kay DA Spokesperson Assistant Secretary Arnel de Mesa, makasigurado ang mga mangunguma nga sa tama nga presyo mabakal ang ila nga mga ginpang-ani nga humay.
Sakupon sang ginatun-an nga floor price sa humay ang mga trader, indi lamang ang National Food Authority.
Nagapatigayon man ang ahensya sang mga pagtuon natuhoy sa mga legal nga pamaagi sa idalom sang Price Act, Anti-Agricultural Economic Sabotage Law kag iban pa nga mga layi.
Katuyuan sang sini nga tikang nga masigurado nga mahatagan sang bastante nga proteksyon ang mga mangunguma kontra sa mga trader nga gapang-abuso sa ila.
Sandig sa datos sang ahensya, magalab-ot sa 32 nga lugar sa Luzon kag Mindanao ang may manubo nga presyo sang baklanay sang mga trader sa humay kun sa diin nagasadsad ini sa P15 kada kilo.
