Pagakakason sang Department of Agriculture (DA) ang maximum suggested retail price (MSRP) sa pork products nga ginabaligya sa merkado bangud sa manubo nga compliance sang mga retailers.
Suno kay DA USec. para sa Livestock Constante Palabrica, natalana nga ipahibalo ang pagkakas sang MSRP sa nasambit nga produkto sa sulod sang 24 oras.
Ini nga tikang pagahimuon samtang ginahiwat ang dugang nga pagtuon kon paano mas maayo nga ipatuman ang MSRP kag agud ma-engganyo ang mga retailer sang baboy nga magsunod sini.
Gin-athag sang opisyal sang DA nga nabudlayan ang mga pork retailers sa pagsunod sa MSRP bangud sa manubo nga supply sang karne sang baboy sa tunga sang nagapadayon nga problema sa African Swine Fever kag mataas nga demand sa amo nga produkto sini nga eleksyon.
Humalin sang ginpatuman ang nasambit nga polisiya sang Marso 10, mga 30% pa lang ang naka-comply sa MSRP para sa pork products.
Una na nga gintalana sang DA ang MSRP nga P380 kada kilo para sa liempo, P350 kada kilo para sa kasim kag pigue nga ginabaligya sa mga merkado sa Metro Manila kag P300 kada kilo para sa karne sang baboy nga ginabaligya sang mga negosyante sa mga retailer magluwas sa mga supermarket kag hypermarket.
