Posible nga magtalana na man ang Department of Agriculture (DA) sang maximum suggested retail price (MSRP) sa mga presyo sang produkto sang baboy sa mga nagapanguna nga merkado kun padayon nga magtaas ang presyo sang mga ini.
Ini matapos magpatigayon sang inspeksyon sa mga merkado ang mga opisyal sang departamento kun sa diin nakita nila ang nagataas nga gap sa tunga sang farm gate prices kag retail prices.
Ang baligyaanay sang mga livestock sang baboy ang yara sa P220-P240/kilo samtang ang retail prices naman ang yara na sa taas nga P380-P420/kilo.
Suno kay Agriculture Secretary Francisco Tiu Laurel Jr., ang pagtalana sang MSRP sa mga nasambit nga produkto amo agud malikawan ang profiteering ukon overpricing sa mga merkado.
Dugang pa ni Laurel, magatalana lamang ang ila departamento sang MSRP kun nakitaan gihapon ini sang kinahanglanon kag indi ordinary nga mga margins sang mga retailers, mataas ang posibilidad sang pag-anunsyo sini.
Sa pihak nga bahin, ang nakikita nga rason naman sang mga retailers ang nangin mga kaso sang African Swine Fever (ASF) sa pungsod sa nagapadayon nga pagtaas ng presyo sa mga nasambit nga produkto.
Gilayon naman nga ginkontra ni Laurel nga ang padayon nga paglobo sang ASF ang rason para sa pagsipa sang presyo sang mga produkto sang baboy sa merkado. Suno sa tiglikom, padayon ang ila mga ginahimo nga mga efforts para sa epektibo nga mga pagbakuna sa mga apekatado pa nga lugar rason nga indi dapat magkabalaka ang publiko.
Sa karon, mas manubo na ang numero sang mga apektado nga lugar sang ASF ikumparar sang nakaligad nga tuig. Humalin sa 200 nga mga apektado nga mga barangay, yara na sa 133 na lamang ini base sa nangin datos sang latest update sang ahensya.
Samtang, kaangut sini plano naman sang ahensya nga irekomendar ang pag-apruba sang isa ka bakuna sa ASF nagikan sa Vietnam para sa komersyal nga paggamit sini subong nga tuig agud tayuyon na nga matapna ang mga isyu sa ASF kag mangin sa bird flu.
