Wala sang plano ang Department of Agriculture (DA) nga magpatuman sang import ban sa bugas sa pihak sang pagpamahog nga dala sang ginapaabot nga El Niño sa ulihi nga bahin sang tuig.
Suno kay Agriculture Secretary Francisco Tiu Laurel Jr., wala sang rason nga ipatuman ang import ban sa tunga-tunga sang Nobyembre kag Disyembre.
Samtang nagahanda ang pungsod para sa palaabuton nga tig-alani sa “ber” months, naglab-ot na sa 3.3 million metric tons ang kabug-usan nga gin-import nga bugas sa Pilipinas, base sa pinakabag-o nga data sang ahensya.
Ginpahayag man ni Tiu Laurel nga kinahanglan mapabakod ang buffer stock sang bugas agud masiguro ang suplay sa tion sang pinakabaskog nga epekto sang El Niño.
Apisar sini, ginpasiguro sang DA nga indi nila pagpahanugotan nga magnubo ang farm-gate price sang humay bangud sang mas daku nga volume sang imported nga bugas.
Pahayag ni Tiu Laurel, handa ang National Food Authority (NFA) nga magbakal sang 500,000 ka tonelada sang humay halin sa mga lokal nga mangunguma.
