Padayon ang information dissemination sang Department of Agriculture (DA) Western Visayas sa mga mangunguma agud makapreparar sa posible nga epekto sang El Niño.
Sa interview sang Bombo Radyo kay Engr. Jimmy Eledia Jr., Senior Agriculturist kag Focal Person sang DA Western Visayas, iya ginpahayag nga ang sektor sang agrikultura ang isa sa pinakaapektado kun may El Niño, ilabi na ang mga talamnan sang palay.
Suno kay Eledia, padayon nga ginasuportahan sang DA ang mga mangunguma paagi sa nagkalain-lain nga programa kag sa bulig man sang mga local government units agud mahagan-hagan sa mga mangunguman ang epekto sang El Niño sa ila pangabuhian.
Ginahingyo man sang DA sa mga mangunguma nga indi magrisgo sa pagtanom kun kulang ang suplay sang tubig kag magpangayo sang giya sa lokal nga agriculture office antes magdesisyon sa pagpananom paagi sini malikawan ang daku nga kapierdehan sa ila mga pananom.
