ROXAS CITY – Nagaguwa sa inisyal nga imbestigasyon sang Panitan PNP nga daan nga hiligut-anon ang ginatan-aw nga motibo sa pagpangluthang-patay sa isa ka bulangero kahapon, Enero 7 sa Sitio Cabutungan, Brgy. Conciencia, Panitan.
Matandaan nga ginkilala ang biktima nga si alyas ‘Llyod’ samtang ang ginatudlo nga mga suspek amu sanday alyas ‘Ryan’, alyas ‘Nene’ kag alyas ‘Boyet’ lunsay mga residente sang nasambit nga banwa.
Sa interview sang Bombo Radyo kay Police Major Amie Bulaqueña, hepe sang Panitan Municipal Police Station, suno diri sandig sa panaysayon sang mga nakasaksi sang insidente, una nga nagpanghangkat sang ‘rematch’ ang biktima sa mga suspek tubtob nga naglagsanay ang mga ini paguwa sang bulangan.
Antes pa ang insidente, ginaalegar may nagluntad man nga indi pag-intindihanay sa tunga sa mga suspek kag biktima sa isa pa ka bulangan sa syudad sang Roxas.
Matandaan, ginluthang sang maka-tatlo ka beses ang biktima gamit ang indi pa matumod nga sahi sang armas-luthang sa diin nagresulta sa gulpi nga kamatayon ni alyas ‘Llyod’.
Narekober sa ginluntaran sang insidente ang apat ka unfired cartridge sang kalibre 45 nga armas-luthang.
Samtang, madasig naman nga nagpalagyo ang mga suspek matapos ang krimen kag sa karon padayon nga gina-ayam sang mga kapulisan.
Gintuad man ni Bulaqueña nga may nabalhag nga mga barangay kag police blotter batok kay alyas ‘Lloyd’ sang ini ang menor de edad pa.
Sa karon, ginapadalman pa sang kapulisan ang natabo nga insidente.
Desidido naman nga magpasaka sang kaso ang pamilya sang biktima sa mga suspetsado.
