Dakop sa akto ang 22-anyos nga lalaki samtang, madasig naman nga nakapalagyo ang kaupod sini matapos nagpatigayon sang pagpangawat sa isa ka cell site sa Barangay Bato, Roxas City.
Ginkilala ang mga suspetsado kanday alyas “Vince”, 22-anyos kag alyas “Jen”, yara sa legal nga pang-edaron kag lunsay mga residente sang Brgy. Cagay, Roxas City.
Sandig sa nakuha nga impormasyon sang Bombo Radyo sa Roxas PNP, base sa nangin pahayag ni alyas “Rom”, maintenance employee sang cell site, gin-inform ini sang ila nga higher headquarters nga may na-activate nga failure alarm sa ila kompanya.
Sang nabaton ni alyas “Rom” ang amo nga impormasyon, gilayon ang mga ini nga nagpadulong sa lugar kag didto nadakpan sa akto ang suspetsado nga gina-balhin na kun tani sa isa ka motorsiklo ang mga pagkabutang nga ginabulubanta nga nagabalor sang P50,000.
Nadakpan si alyas “Vince” sang mga katapo sang kapulisan samtang, si alyas “Jen” naman ang madasig nga nakapalagyo sa lugar.
Sa karon, yara na sa kustodiya sang Roxas City PNP ang amo nga suspetsado para sa nagakaigo nga disposisyon.
