ROXAS CITY – Hugot na pagabantayan sang Traffic Management Unit kag pagatutokan sang ila talatapan ang dalagan sang trapiko kadungan sa pagdamo sang mga behikulo sa syudad sang Roxas.
Ini ang ginpahayag ni Mr. Gonzalo Andrada Jr., pinuno sang Traffic Management Unit (TMU) sang mainterview sang Bombo Radyo.
Suno kay Andrada ginadumilian nila ang mga pagparada sang ilegal sa may Roxas City Plaza agud magdaku ang ligwa sang dalan kag mangin maayo ang hulag sang trapiko.
Katuyuan sini agud indi makaistorbo sa dalagan sang trapiko, pagatugutan lamang ang one lane parking sa mga pili nga lugar.
Samtang, no parking both sides naman sa mga mayorya nga dalanon apang ginahatagan sang konsiderasyon ang mga kustomer sang pila ka establisyemento sa sulod lamang sang gintalana nga oras.
Pahayag sini nga magapangatubang sa penalidad ang madakpan nga nagpark sa mga ginadumilian nga lugar.
Panugyan ni Gonzalo sa tanan nga mga motorista nga magapadulong sa syudad sang Roxas mangin responsable nga drayber agud malikawan ang mga bayolasyon kag magkooperar sa pagsulundan sa dalagan sa trapiko ilabi na sa mga dumuluong sang syudad.
