ROXAS CITY – Hustisya sa nadangatan sang 13-anyos nga dalagita ang ginasinggitan sang pamilya ni alyas Mimi nga ginhimuslan sang pakaisa sa sulod sang ila balay sa isa ka banwa sa Capiz sadtong Disyembre 11, 2017.
Sa exclusive interview sang Bombo Radyo Roxas kay Mrs. Michelle, iloy ni Mimi nga wala nila ginalauman nga mahimo sang hinablos nga si alyas Noynoy 18-anyos nga himuslan ang pakaisa.
Suno sa ginang nga naglakat sila sang mister kaupod ang hinipo nga anak para magbulig sa preparasyon sa nagahilapit nga family reunion sang ila nga pamilya kag gintugyan ang duha ka mga anak nga naga-eskwela sa iya nga bayaw.
Pag-abot sang gab-i, gin-ako sang suspek sa tiya nga ginbilinan sa duha ka menor de edad nga siya na lamang ang maupod sa mga kabataan sa pagtulog sa ila balay.
Bangud sa nangin gesture sang suspek napahamtang ang buot sang tiya kag nagpauli ini sa ila nga balay.
Apang pagkagab-i nakibot si alyas Mimi sang nagsulod sa ila kuwarto ang suspek kag naghulid sa iya tobtob nga gintutukan na ini sang kustsilyo kag ginhimuslan sang duha ka beses.
Wala sang nahimo ang biktima, bangud ginpahog ini sang suspek nga patyon kun magpanugid.
Nahibaluan lamang sang ginikanan sang dalagita ang natabo sa ila anak matapos natingala sila sang makita ang manubo nga score sa iya nga exmaination nga wala nagakahinabo.
Magluwas diri, ginkatingala sang ginang nga maluya ang anak rason nga iya ini gin-usisa kag bangud wala na mapunggan pa sang biktima ang emosyon ginsugid sini sa iloy nga ginhimuslan siya sang pakaisa.
