Dalan sa Dayao, Roxas City nga masami ginareklamo sang mga motorista , kaayuhon na

ROXAS CITY – Nagpasalamat si Punong Barangay Wenie Batuampo sa Roxas City Government matapos ginsabat ang ila ginahingyo nga pagkaayo sang dalan sa Barangay Dayao nga masami ginareklamo ang mga motorista.

Sa interview sang Bombo Radyo kay Punong Barangay Batuampo, iya ginpahayag nga una anay nga ginkaayo sang City Engineering Office ang drainage agud indi magbaha antes kaayuhon ang guba nga dalan.

Suno kay Batuampo, masami siya nga nagabaton sang reklamo halin sa motorista nga kun maglabay sa dalan nga sakop sang ila barangay, daw kaangay nga ginabalda ang ila lawas kag nagatapik pa ang lutak sa ila mga salakyan.

Nagapangabay ang Punong Barangay sa publiko sang paghangop kag kooperasyon samtang nagapadayon ng trabaho.