ROXAS CITY – Ginpanginwala sang kapitan sang Barangay Dayao sa sining syudad nga wala nila gina-aksyunan ang nagabaha nga dalanon sa Ilaya Street sa nasambit nga Barangay.
Sa interview sang Bombo Radyo kay Emily Ariza, Punong Barangay sang Barangay Dayao, ginpahayag sini nga madugay na nila ginaplanuhan nga kay-uhon ang nasambit nga dalanon.
Gintu-ad ni Kapitan nga rason sang pagbaha kag wala pagkahubas sang tubig, ang ginkay-o nga karsada kun sa diin wala nabutangan sang kanal agud maagyan sang tubig.
Suno diri, may yara na sang budget para sa proyekto nga pagpabutang sang drainage system gikan sa City Government kag nagpasalig ang Punong Barangay nga suguran na ang pagpakay-o sa bulan sang Hulyo.
Panugyan ni Kap Ariza sa mga pumuluyo nga maghulat sa bulan sang Hulyo kag sa isyu naman sang dengue, mahimo nga magpanglimyo sa tagsa ka panimalay ilabi na sa mga lugar nga ginatiniran sang tubig bangud responsibilidad man ini sang mga pumuluyo.
