Nakatalana nga makighinun-anon si Danish Foreign Minister Lars Løkke Rasmussen sa iya nga Filipino counterpart sa Manila agud pabaskugon ang kooperasyon sa nagkalain-lain nga patag, kalakip ang trade kag maritime affairs, suno sa Department of Foreign Affairs (DFA).
Si Rasmussen ang magabisita sa Manila sa Disyembre 9 kag 10, ang una nga pagbisita sang isa ka Danish foreign minister sa pungsod sa sulod sang 25 ka tuig.
Suno sa DFA, ang pakighinun-anon sini kay Foreign Affairs Secretary Enrique Manalo ang magapokus man sa pagpabaskog sang kaangtanan sa green shipping, green transition, health, financial and development cooperation, kag people-to-people links.
Magluwas diri, ang duha ang magabaylohanay man sang mga panan-awan kag plano sa regional kag international issues.
Si Rasmussen ang ginalauman man nga magabisita sa Philippine Coast Guard, nga magahatag sa minister sang brief overview sa sitwasyon sa West Philippine Sea. Ang pag-atubangay ang ginalauman nga magaserbe nga oportunidad agud ipakita ang commitment sang Denmark sa pagduso sang kalinong, kapag-on, kag sang rules-based international order sa rehiyon.
