DAO, CAPIZ- Ginpasidunggan sang Philippine Drug Enforcement Agency (PDEA) ang banwa sang Dao, Capiz sang Balangay Zeal of Excellence for Drug-Free Municipality sa isa ka seremonya sa Dao Municipal Hall sang Hunyo 3, 2025. Personal ini nga ginbaton ni Mayor Jimbo Barruela bilang pagkilala sa malimpyo nga kampanya kontra droga sang banwa.
Sa interview sang Bombo Radyo kay Police Captain Rian Ampoyos, hepe sang Dao MPS, ginpahayag nga ang kadungganan isa ka resulta sang hugot nga kooperasyon sang Local Government Unit sang Dao, Department of Interior and Local Governmeny, mga kapulisan, kag mga barangay opisyal sa pagpanguna sang BADAC (Barangay Anti-Drug Abuse Council). Ginpabutyag niya nga may daku nga papel ang Barangay Anti-Drug Abuse Council sa pagbantay nga wala sang illegal drug activities sa tagsa ka barangay, kag may “Pulis sa Barangay” man nga nagaresponde sa mga reklamo.
Dugang pa ni Police Captain Ampoyos nga wala pa sang narecord nga insidente ukon aktibidad sang droga sa banwa, kabangdanan sang padayon nga suporta sang komunidad. Ginkilala man ni Mayor Barruela ang kontribusyon sang mga opisyal kag pumuluyo sa pagpaninguha nga mangin drug-free ang Dao.
Base sa mga operasyon sang Dao MPS halin Enero tubtob Hunyo 2025, nadakpan ang Top 1 Most Wanted Person sa kaso nga murder, upod ang apat pa ka wanted persons. May search warrant man nga natuman kag kaso nga na-file sa idalom sang RA 10591 ukon Comelec Gun Ban, bangud sang report halin mismo sa mga residente.
Samtang wala man sang nareport nga presensya sang Communist Terrorist Group sa lugar.
Tuman naman ang pagpasalamat ni Police Captain Ampoyos sa mga pumuluyo sa ila aktibo nga partisipasyon sa pagmintinar sang katawhayan kag kalinong sa banwa sang Dao.
