DAO, CAPIZ- Naka-full alert status na ang Dao Municipal Disaster Risk Reduction and Management Council para sa pag-igo sang Bagyo Tino sa probinsya sang Capiz.
Sa interview sang Bombo Radyo kay Wilmor Robles, Head sang Municipal Disaster Risk Reduction and Management Council, iya ginpahayag nga nagpatigayon na ang ila nga talatapan sang pre-disaster risk assessment kaupod sang nagkalain-lain nga ahensya sang gobyerno, mga katapo sang kapulisan, bombero kag mga Punong Barangay.
Suno kay Robles, sa nasambit nga pagsinapol, gintalakay ang mga ginapatigayon nga mga preparasyon kag mga butang nga dapat himuon sa tion sang Bagyo.
Pahayag nya, nakaplastar naman ang tagsa ka mga evacuation centers kag mga tents. Subong man, naka-prepositioned naman ang mga water assets kag mga responders.
Nahibaluan nga ang 19 sa 20 tanan ka mga kabarangayan sang Dao ang mabinahaon, apang wala pa naman sa subong sang may namonitor nga ginbaha na kag may nag-amat-amat na nga mga pumuluyo ang nagpatigayon sang preemptive evacuation, sa diin sa subong may yara sang 10 ka mga pamilya ang sa Poblacion Ilawod, kag duha naman sa Poblacion Ilaya.
Nagapanawagan naman ang mga natungdan sa mga pumuluyo nga magpabilin nga aligmat kag kun ginakinhanglan na nga mag-evacuate, magpadulong gilayon sa mga evacuation centers.
Interviewed by Bombo Jessa Mae Siman De Los Santos
