Nagapatigayon ang Dapat Isa Lang Coalition sang online signature campaign para sa ginaduso nga genuine Anti- Political Dynasty Law.
Ang digital signature platform pormal nga ginlunsyar sa bilog nga Pilipinas sang Setyembre 30, 2026.
Sa interview sang Bombo RAdyo kay Msgr. Meliton Oso, Director sang Jaro Archdiocesan Social Action Center (JASAC), iya ginpahayag nga ang movement ang ginpasakupan sang mga tawo nga kapoy na sa nagakatabo nga kurapsyon kag kaimulon bangud sang political dynasty.
Suno kay Oso, 39 anyos na ang nakaligad apang wala sa gihapon ang Konstitusyon sang mapag-on nga layi sa paghatag sang patas nga oportunidad kag serbisyo kag dumilian ang political dynasty.
Gin-athag man sini nga wala sila sang may ginakontra ukon ginatumod nga partikular nga pamilya kundi nga hatagan sang palareho nga oportunidad nga makapangalagad sa gobyerno ang mga nagakadapat.
Target sang online signature campaign nga makatipon sang indi magnubo sa 10% sang registered voters sa bilog nga Pilipinas kag indi magnubo sa 3% sang registered voters sang isa ka legislative district.
