Naghinyo ang filmmaker nga si Darryl Yap sa korte sang gag order nagikan sa Muntinlupa City Regional Trial Court (RTC) Branch 205 agud punggan ang kampo sang beterano nga aktor kag host nga si Vic Sotto nga istoryahan ang anuman nga detalye angut sa kaso nga ginkaulamiran sang kontrobersyal nga pelikula ni Yap nga ‘The Rapists of Pepsi Paloma’.
Ang mosyon ang sabat sa reklamo ni Sotto nga 19 counts sang cyber libel, nga may kalakip nga danyos nga nagadangat sa P35 milyon.
Ini bangud sa isa ka teaser nga ginpaguha sang Enero 1, 2025 para sa pelikula ni Yap, nga nagakaunod sang mapanamad nga pahayag tuhoy kay Sotto, kun sa diin ginaangut ini sa nagtaliwan nga sexiest star sang dekada ’80 nga si Pepsi Paloma.
Pahayag sang legal counsel ni Yap nga si Atty. Raymond Fortun ang pagbuyagyag sang iya verified return (opisyal nga sabat sa kaso) bangud ini ang mangin paglapas sa freedom of expression sang kliyente sini kag posible nga magtuga sang kahalitan sa pelikula, ilabi na nga wala pa ini ginapaguha.
Kun pagatugutan, ang gag order ang magapauntat kay Sotto ukon sa mga kinatawan sini nga magpahayag sa publiko angut sa kaso, bangud ang usapin ang nakabaton na sang mga atensyon gikan sa media. Ginmensyunar man sang kampo ni Yap nga ini ang ayon sa ‘sub-judice rule,’ nga nagabawal sa publiko nga magkomento sa mga kaso nga may paglilitis sa karon.
Nagpasalamat naman si Yap sa legal counsel sini, partikular kay Fortun kag sa bata sini nga si Raymond Wilhelm Fortun, sa isa ka post sa social media kun sa diin nagpakigbahin ini sang laragway nga magkaupod ang mga ini. ‘Thank you Fortuns,’ caption sini sa post.
