Magahatag sang libre nga serbisyo legal para sa dugang nga ihibalo sang mga Overseas Filipino Workers ang ginaplano nga Defense Base Act (DBA) 2026.
Sa interview sang Bombo Radyo kay Atty. Reylan Maria Garcia-Te, legal officer sang Pillar Bridge Solutions, iya ginpahayag nga ang forum isa ka educational kag legal awareness event nga nagatutok sa mga Pilipino nga nagaubra sa abroad, labi na gid sa high-risk kag U.S.-contracted jobs.
Suno kay Te, gin-organisa ini nga lihok upod ang iban nga legal kag advocacy organizations agud mapalapad ang kaalaman sang mga manggagawa parte sa ila mga kinamatarong kag benepisyo.
Pahayag pa niya, target sang forum ang mga OFWs kaangay sang security personnel, construction workers, translators kag iban pa nga na-deploy sa Middle East kag iban nga delikado nga lugar.
Dugang pa niya, talakayon sa forum ang mga isyu sang workplace injuries, disability benefits kag claims process sa idalom sang Defense Base Act nga nagahatag proteksyon sa mga civilian workers nga nagaubra sa U.S. projects sa abroad.
Gin-athag man sini nga libre ang pagtambong sa forum kag makabaton ang mga participants sang legal consultation kag praktikal nga giya halin sa mga eksperto.
Nagalaum man ang natungan nga paagi sa forum, mas mangin preparado kag may bastante ng ihibalo ang mga Pilipino sa pag-angkon sang ila mga benepisyo kag legal nga proteksyon.
