Gin-aprubahan sang Department of Budget and Management (DBM) ang pag-release sang P3.39 billion nga pondo para sa performance-based bonus sang Philippine National Police (PNP) personnel.
Suno sa ahensya, ang amo nga pundo ang makabenepisyo sa 225,545 ka kwalipikado nga mga opisyales kag tinawo sang national police.
Ang tagsa ka kwalipikado nga opisyal kag tinawo sang PNP magabaton sang performance-based bonus nga katumbas sa 45.5% sang ila bulanan nga basic salary base sa Disyembre 31, 2023.
Para mangin kwalipikado para sa bonus, ginpahayag sang ahensya nga ang mga yara sa First, Second kag Third Levels dapat makabaton sang ‘very satisfactory’ nga rating sa idalum sang Civil Service Commission-approved Strategic Performance Management System ukon katumbas sa rating nga ginapangayo sang Career Executive Service Board.
Gin-anunsyo man sang ahensya nga ang pag-release sang performance-based bonuses para sa mga police officers ang nasanto sa direktiba ni Presidente Ferdinand Marcos Jr. agud labi pa nga mapabaskog ang moral kag kaayuhan sang mga mamumugon sa gobyerno, partikular ang mga law enforcement frontliners.
Pahayag pa ni Budget Sec. Amenah Pangandaman, ini bilang pagkilala man sa ila serbisyo kag kumpirmasyon sang ila pangako sa gobyerno nga padyaan ang performance kag responsibilidad sang pwersa sang kapulisan nga isa sa mga haligi sang aton pungsod nga nagapasiguro sang kalinong kag katawhay sa adlaw-adlaw.
