MANILA, Philippines – Ginmanduan sang Department of Budget and Management “DBM”, ang tanan nga ahensya sang gobyerno nga i report ang natipid nga pondo bangod sa oil crisis.
Sa idalom sang National Budget Circular No. 602, ginakinahanglan ang 20 porsyento nga pagnubo sa Maintenance and Other Operating Expenses “MOOE”, pareho sang biyahe, training kag utilities.
Suno sa DBM, gamiton ini nga pondo para suportahan ang mga programa nga makabulig sa ekonomiya kag komunidad nga apektado sang krisis.
Ginarekomendar man ang paghalong sa paggasto, lakip ang pagpaliban sang indi prayoridad nga proyekto pareho sang pagbakal sang salakyan kag construction sang bag-o nga building.
Sa karon ang ahensya ginatugyanan nga magsumite sang ila report antes mag Mayo 15, samtang ginapaabot ang bilyones nga pondo nga makolekta halin sa sini nga tikang.
