Nagpaguwa ang Department of Budget and Management ukon DBM sang P27.410 billion nga pondo para sa medical assistance sang mga pigado kag financially incapacitated nga mga Pilipino sa bug-os nga pungsod.
Pagagamiton ang pondo sa Medical Assistance to Indigent and Financially Incapacitated Patients ukon MAIFIP Program sang Department of Health para sa hospitalization, medicine, emergency treatment kag iban pa nga medical services.
Kabahin sang pundo ang magakadto sa Centers for Health Development kag mga ospital sang DOH agud magdul-ong sang bulig sa mga pasyente pinaagi sa publiko kag private health facilities.
Suno kay Budget Secretary Kim Robert de Leon, tinutuyo sang amo nga pondo nga makadala sang bulig sa mga nagakinahanglan kag mabuhinan ang gastos nga dapat pas-anon sang mga pamilya halin sa ila kaugalingon nga bulsa.
