Ginpahayag ni De Leon nga ang ICC amo ang una nga opisyal nga korte nga may awtoridad nga magpamati sa mga testimonya sang mga biktima kag maghatag sang proteksyon sa mga testigo samtang ginadumala ang kaso.
Dugang pa niya, padayon ang proseso sang kaso bisan pa may mga tikang ang kampo ni Duterte nga mapatras ukon mapalawig ang pag-usisa sang korte. Gin-athag man niya nga lain ang ICC trial sa mga pribado nga inisyatibo nga nagatipon sang mga salaysay sang mga biktima, bangud ang ICC isa ka opisyal nga internasyonal nga hukuman nga may gahum sa paghusgar kag paghatag hustisya.
Suno kay De Leon, sa pagsugod sang paglilitis, pagatun-an sang korte ang mga ebidensya kag testimonya sang mga biktima samtang hatagan man sang kahigayunan ang depensa nga sabton ang mga alegasyon batok sa anay pangulo.
