Naglab-ot na sa 69 ang mga napatay sa mabaskog nga 6.9-magnitude nga linog nga nag-igo sa isla sang Cebu sang Martes sang gab-i.
Suno sa mga disaster officials, posible nga magtaas ang numero samtang nagapadayon ang rescue and recovery operations sa mga narumpag nga buildings, lakip na ang isa ka sports complex sa banwa sang San Remigio sa diin pila ka mga residente ang napatay kag ang iban ang ginreport nga na-trap.
Ang linog nga ginakabig isa sa pinakamabaskog sa nakaligad nga napulo ka tuig ang nagtuga sang pagkadula sang kuryente, pagkaguba sang imprastraktura, kag pagkaguba sang mga pamalay sa nagkalain-lain nga banwa kag syudad sa Cebu.
Kadungan sini, personal nga ginpangunahan ni Cebu Governor Pamela Baricuatro ang koordinasyon sa mga ahensya sang gobyerno kag local disaster units agud masiguro ang madasig nga pagresponde sa mga apektado nga lugar. Naghatag ini sang mandu nga unahon ang search and rescue, kag pagasundan sang relief distribution kag pagplastar sang mga evacuation centers para sa mga nadulaan sang puluy-an.
Padayon naman ang operasyon kag pagbinuligay sang mga tinawo gikan sang Bureau of Fire Protection, kapulisan, militar, kag lokal nga panguluhan. Ginpasalig man sang national Government ang paghatag sang relief goods, medical assistance, kag temporaryo nga puluy-an para sa mga apektado.
Nagpaandam man ang mga eksperto nga magpabilin nga mabinantayon sa posible aftershocks nga posible makatuga sang dugang nga kahalitan.
