Wala untat ang pagpangita sang mga rescuer sa mga survivor matapos nag-igo ang mabaskog nga linog nga nag-utas sang kapin 126 ka indibidwal kag naghalit sa masobra 3,000 ka buildings sa remote region sang Tibet sa China.
Samtang 188 naman ka tawo ang nabalhag nga nagkalasamaran.
Ginlunsyar na ang lapnagon nga rescue operation sa pihak sang kabudlay sa pag-rescue sa mga posible survivor bangud ginalauman nga maganubo pa ang temperatura sa rehiyon sa -16 degrees Celsius.
Una na diri nga nag-igo ang magnitude 7.1 nga linog sa Tibet malapit sa Everest nga may kadalumon nga 10 kilometers ukon 6 miles base sa datos gikan sa US Geological Survey.
Nabatyagan man ang mabaskog nga linog sa Nepal kag pila ka parte sang India nga malapit sa Tibet.
Ang nag-igo nga linog sa China sang Martes ang isa sa ginakabig nga deadliest earthquake nga nag-igo sa pungsod sa mga nakaligad nga tuig.
