Nagsaka na sa 60 ka tawo ang napatay sa makahalalit nga baha nga nag-igo sa China sang nagligad nga semana.
Lakip sa mga napatay amo ang 31 ka mga indibidwal gikan sa elderly care home sa nabukid nga Miyun district sang Beijing bangud sa pagbaha nga ginakabig nga isa sa pinakamakamamatay nga baha nga nag-igo sa kapital sang China sang nagligad nga mga tinuig.
Sa Beijing, may kabug-usan nga 44 ka tawo ang napatay kag 9 ka indibidwal ang nadula tubtob Huwebes suno kay Beijing deputy mayor Xia Linmao.
Ang mabaskog nga ulan nagsugod sa pag-igo sa Beijing kag sa palibot nga mga probinsya sang nagligad nga semana kag naglab-ot sa putukputukan sang Lunes.
Kon sa diin ang distrito sang Miyun gin-igo sang mga ulan nga magalab-ot sa 573.5 millimeters (mm) nga pag-ulan nga ginlaragway nga tuman ka makahalalit. Halos nakalab-ot na ini sa lebel sang average nga tuigan nga pag-ulan sang Beijing nga 600 mm.
Sa kaiping nga probinsya sang Hebei, 16 ka tawo ang napatay bangud sang mabaskog nga ulan.
Walo ka tawo ang narekord nga nadulaan sang kabuhi sa syudad sang Chengde sa guwa sang Beijing, sa diin 18 pa ang wala pa makita.
Nagapuno man ang reservoir sa tunga sang pag-ulan, nga nagatuga sang kahalitan sa kaiping nga mga banwa. Kon sa diin ang Hebie village sa north sang reservoir nakarekord sang landslide nga nagpatay sang 8 ka tawo samtang 4 naman ang missing.
Ginaugnay sang mga meteorologist ang mabaskog nga pag-ulan kag pagbaha sa China bangud sa climate change.
