Padayon nga nagataas ang mga nagkalamatay sa makahalalit nga baha sa Nepal matapos ginreport sang National Disaster Risk Reduction and Management Authority ukon NDRRMA nga 626 na ang kumpirmado nga napatay samtang 2,426 naman ang missing.
Mas mataas ini sangsa nauna nga report sang Nepal Police nga naka-record sang 616 casualties kag 1,924 ka missing individuals.
Samtang, ginpahayag naman sang mga opisyal sa Chitwan District nga sa 233 ka mga bangkay nga ila narekober, apat lamang ang positibo nga nakilala bangud kalabanan sa mga bangkay ang yara na sa advanced state of decomposition.
Suno sa mga otoridad, temporaryo nga ginabutang sa holding centers kag health facilities ang nabilin nga 229 ka mga bangkay samtang ginakuhaan sang DNA samples kag gina-analyze agud mahibaluan ang identity sang mga biktima.
