Nagsaka na sa 40 ang napatay matapos ang magnitude 7.8 nga linog nga nag-igo sa Mindanao sang Lunes, Hunyo 8.
Base sa pinakaulihi nga report sang Office of Civil Defense (OCD), apat ka mga tawo ang nagapabilin nga missing samtang 478 naman ang ginreport nga pilason.
Suno sa OCD, ang General Santos City, Sarangani, kag South Cotabato ang nalakip sa pinakagrabe nga naapektuhan sang linog.
Madamo man nga mga pamilya ang napilitan nga mag-evacuate bangud sa kahalitan sang kalamidad sa ila mga puluy-an.
Ginabulubanta nga masobra P562.8 million ang balor sa kahalitan sang imprastraktura sa Davao Region kag SOCCSKSARGEN.
Samtang padayon pa nga na-eksperyensiyahan ang aftershocks sa lugar.
Sa subong, ang mga otoridad nakatutok sa search, rescue, kag retrieval operations agud buligan ang mga apektado kag makita ang mga nadula nga mga indibidwal.
Kapin naman sa 2,700 ka mga personnel gikan sa Armed Forces of the Philippines, Philippine National Police, kag Bureau of Fire Protection ang ginpadala sa mga apektado nga lugar agud magbulig sa operasyon.
