Isa ka daku nga kadalag-an para isa ka newly promoted teacher gikan sa Basiao National High School, ang mangin Teacher VI halin sa Teacher III matapos ang walo ka tuig nga hugot nga serbisyo sa patag sang edukasyon.
Sa interview sang Bombo Radyo kay Rodgemar Olapane, iya ginpahayag nga madamo ini sang naagyan nga kabudlayan antes niya nalab-ot ang iya karon nga posisyon, apang wala ini nakapugong sa iya determinasyon nga magpadayon sa pagtudlo kag magserbisyo sa kabataan.
Suno kay Olapane, nangin isa siya ka working student nga nagapanikasog sa pag-eskwela samtang nagahimo sang paagi agud masuportahan ang iya adlaw-adlaw nga kinahanglanon.
Pahayag pa niya, halin pa sang una yara na sa iya tagipusuon ang mangin manunudlo bangud sa iya gugma sa pagtudlo kag sa impluwensya sang iya pamilya nga kadam-an man sa ila yara sa teaching profession. Ini ang nagin inspirasyon niya agud magpabilin kag magpursige bisan pa sang mga pagsuway nga iya naagian sa obra kag kabuhi.
Dugang pa sini, ang pagtudlo isa ka matrabaho nga propesyon nga nagakinahanglan sang mahaba nga pasensya, pag-intindi, kag dedikasyon nga nagahatag sang maayo nga resulta sa paghulma sang mga estudyante.
Nagapasalamat man ang natungdan sa iya pamilya nga wala nagbiya sa iya sa bug-os nga journey sang iya career nga nagahatag sa iya sang kusog, inspirasyon, kag paglaum agud malab-ot ang kadalag-an kag magpadayon pa gid sa iya serbisyo bilang manunudlo sa kabataan.
