Nag-object ang defense counsel nga si Atty. Lindon Bacquel sa pagtinguha sang House prosecution nga ipresentar ang Statement of Assets, Liabilities and Net Worth ukon SALN ni Vice President Sara Duterte sa impeachment trial.
Natabo ini samtang ginakwestyon ni House prosecutor Keith Flores ang Land Registration Authority ukon LRA representative nga si Atty. Kathy Florence Baldonado sa hearing subong nga Huwebes.
Suno kay Bacquel, wala sang bastante nga basehan agud mapresentar ang SALN paagi sa kaangay nga witness bangud ginaalegar nga wala ini sang personal nga ihibalo tuhoy sa SALN sang Bise Presidente.
Bilang sabat, ginpahayag ni Flores nga wala gina-require sang prosekusyon ang testigo nga magtestigo ukon mag-usisa sang kaundan sang SALN.
Suno sa iya, ang requirement lamang sang witness amo ang paghibalo kun ang mga detalye nga nasaad sa mga titulo kag deed of sale ang makit-an man sa listahan sang mga propyedad nga gindeklarar ni VP Sara sa iya SALN.
