Nagpanawagan si Defense Sec. Gilbert Teodoro Jr. sa mga opisyal sang gobyerno ilabi na sa mga gin-eleher sang publiko nga magbuya na lang sa ila pwesto kun maga-pabor ang mga ini sa China kun West Philippine Sea ang paga-istoryahan.
Suno kay Teodoro, responsibilidad sang mga opisyal sang gobyerno nga ipangigbato ang konstitusyon kag ang posisyon sang Pilipinas sa nasambit nga kadagatan.
Wala man ini sang ginpangalanan nga government official, apang madumduman nga nangin kontrobersyal ang mga statement sang pila ka mga senador kasunod sang nagapadayun nga isyu sa West Philippine Sea.
Ginpakigbahin man sang tiglikom nga kun nagapati ang mga ini nga iligal ang posisyon sang Pilipinas sa WPS, mahimo sang mga ini nga kwestyunon ang desisyon sa Korte Suprema.
Nahibaluan nga madamo ang na-rekord nga pagpang-atake sang China Coast Guard sa mga Pilipino sa sulod sang West Philippine Sea, apisar nga yara sa sulod sang Exclusive Economic Zone (EEZ) sang Pilipinas ang Bajo de Masinloc ukon Scarborough Shoal, base sa 2016 Arbitral Award.
