Ginakabig sang isa ka legal expert nga indi maayo nga tikang ang pag-ilis sang lead counsel sang kampo ni former President Rodrigo Duterte sa kaso nga ginpasaka batok sa iya sa International Criminal Court ukon ICC bangud posible ini nga makaapekto sa padayon nga proseso sang kaso.
Sa interview sang Bombo Radyo kay Atty. Joenar Pueblo, President sang Philippine Arbitration Center in Visayas, iya ginpahayag nga ang gulpi nga pagbag-o sang lead counsel sa tunga sang trial nga posible magdulot sang pagbag-o sa depensa ukon strategy sang kampo kag mahimo man nga magpahinay sang kaso.
Suno kay Pueblo, kinahanglan sang bag-o nga defense team sang bastante nga tion agud liwat nga matun-an kag mahibaluan ang tanan nga dokumento kag mga argumento nga napresentar na sa korte, nga posible makaapekto sa padayon nga dalagan sang proseso.
Dugang pa sang natungdan, ang bisan ano nga pagbag-o sa liderato sang legal counsel ang may direkta nga epekto sa continuity sang depensa, labi na nga mabug-at ang kaso nga crimes against humanity nga ginaatubang sang anay presidente.
