Ginahingyo sang defense team ni Vice President Sara Duterte sa Senate impeachment court nga tugutan sila nga magpresentar sang rebuttal evidence sa mga alegasyon nga sakop sang tatlo ka withdrawn articles of impeachment.
Suno kay Atty. Michael Wesley T. Poa, tigpamaba sang grupo sang depensa, wala nila ginakontra ang desisyon sang prosekusyon nga bawion ang mga Artikulo I, III kag IV.
Ang ila ginakabalaka nila kon bala hatagan sila sang kahigayunan nga magpresentar sang mga witness agud sabton ang mga ebidensya nga napresentar na, partikular sa isyu sang confidential funds kag grave threats.
Ginhatagan pagtamod ni Poa nga importante nga mabatian sang publiko ang magtimbang nga bahin.
Luyag man sang defense nga ipaathag sang witness ang mga isyu nga naistoryahan na sang prosekusyon antes ginbawi ang nasambit nga mga artikulo.
Ginpaanggid man ni Poa ang sitwasyon sa impeachment trial ni anay Chief Justice Renato Corona, sa diin suno sa iya, wala pa sang mapresentar nga ebidensya ang prosekusyon sa mga artikulo nga ginbawi sini.
Sa subong nga kaso, ang prosekusyon nagpresentar na sang testimonya sa pila ka mga alegasyon antes nagdesisyon nga bawion ini.
