ROXAS CITY – Nadala pauli sang delegasyon sang Capiz ang 15 tanan nga mga medalya kun sa diin lima diri ang bulawan nga nagikan sa event nga athletics, table tennis, taekwondo kag pencak silat sa bag-o lang nagtakop nga Palarong Pambansa 2024.
Samtang nakakuha naman sang tiglima ka medalya sa silver kag bronze.
Sa interview sang Bombo Radyo kay Mr. Ronnie Retiracion, Sports Coordinator sang DepEd-Capiz, mas madamo ang medalya nga nakuha subong sang delegasyon kun ikumparar sa nakaligad nga tuig.
Nagapasalamat man ini nga wala sang bisan isa nga na-injured tubtob nga natapos ang hinampang.
Dugang pa ni Retiracion nga madamo na sang iban nga eskwelahan halin sa Metro Manila ang nag-scout sa mga atleta sang Capiz nga indi imposible nga ila tanyagan sang scholarship ang pagakuhaon nga player.
Samtang, gintalana na ang ila pagbisita sa opisina sang Gobernador nga dala ang mga medalya nga nakuha nagikan sa palaro kag maghatag sang kortesiya.
Pagatingubon nalang nga iproseso ang insentibo agud mabaton na sang mga atleta nga nakakuha sang medalya sa WVRAA kag Palarong Pambansa.
Mahibaluan nga may ara sang 40 ka mga atleta ang delegasyon sang Capiz nga nadala sa Palarong Pambansa nga ginhiwat sa Cebu kun sa diin yara sa ikatatlo nga puwesto ang Western Visayas.
